کراچی میں رینجرز کی کارروائی، سوات سے تعلق رکھنے والا مطلوب دہشت گرد گرفتار

کراچی( پاکستان خبر)کراچی کے علاقے شاہ لطیف ٹاؤن میں رینجرز نے کارروائی کرتے ہوئے ایک مطلوب دہشت گرد کو گرفتار کر لیا ہے۔ترجمان رینجرز کے مطابق گرفتار دہشت گرد کا تعلق سوات سے ہے اور وہ 2007 میں کالعدم تنظیم کے فضل اللہ گروپ میں شامل ہوا تھا۔ترجمان نے بتایا کہ گرفتار ملزم شکردرہ اور شکردیری میں اسکولوں اور پولیس چوکیوں پر آئی ای ڈی حملوں میں ملوث رہا ہے، جبکہ تھانہ مٹہ پر حملہ، سرکاری اسلحہ لوٹنے اور تھانے کو آگ لگانے جیسے واقعات میں بھی اس کا کردار رہا ہے۔مزید بتایا گیا کہ 2008 میں کارروائی کے دوران وہ مینگورہ میں روپوش رہا اور بعد ازاں بیرون ملک فرار ہو گیا تھا، تاہم 2022 میں واپس آ کر اس نے دوبارہ دہشت گردی کی سرگرمیاں شروع کر دیں۔رپورٹ کے مطابق ملزم کے حملے میں 3 شہری جاں بحق اور 2 زخمی ہوئے تھے، جبکہ وہ مزید نیٹ ورک منظم کرنے کے لیے کراچی میں چھپا ہوا تھا۔گرفتار ملزم کو مزید قانونی کارروائی کے لیے سی ٹی ڈی سوات کے حوالے کر دیا گیا ہے۔