بیجنگ( مانیٹرنگ ڈیسک)چین نے امریکا سے مطالبہ کیا ہے کہ وینزویلا کے صدر نکولس مادورو اور ان کی اہلیہ کو فوری رہا کیا جائے۔ چینی وزارت خارجہ کا کہنا ہے کہ مادورو اور ان کی اہلیہ کی گرفتاری بین الاقوامی قوانین کی صریح خلاف ورزی ہے اور اس اقدام پر چین شدید تشویش میں ہے۔وزارت خارجہ نے زور دیا کہ امریکا مادورو اور ان کی اہلیہ کی ذاتی سلامتی کو یقینی بنائے اور انہیں فورا آزاد کرے۔ چین نے کہا کہ امریکا وینزویلا کی حکومت کو غیر قانونی طریقے سے ختم کرنے کی کوششیں بند کرے اور تمام مسائل کو بات چیت اور مذاکرات کے ذریعے حل کرے۔یہ بیان اس وقت سامنے آیا ہے جب امریکی فوج نے وینزویلا میں کارروائی کرتے ہوئے صدر مادورو اور ان کی اہلیہ کو حراست میں لے کر ملک سے باہر منتقل کر دیا۔چین نے اس کارروائی کو عالمی قوانین کی خلاف ورزی قرار دیتے ہوئے کہا کہ یہ خطے میں امن و استحکام کے لیے بھی خطرہ ہے۔
