ترسیلاتِ زر میں نمایاں اضافہ، پاکستان کی معیشت پر اعتماد مضبوط ہونے لگا

اسلام آباد( کامرس ڈیسک) پاکستان میں معاشی بہتری کے ساتھ بیرونِ ملک مقیم پاکستانیوں کی جانب سے بھیجی جانے والی ترسیلاتِ زر میں نمایاں اضافہ ریکارڈ کیا گیا ہے، جسے ملکی معیشت کے لیے ایک مثبت پیش رفت قرار دیا جا رہا ہے۔مشیرِ وزیر خزانہ خرم شہزاد کے مطابق ستمبر 2026 کے دوران پاکستان کو 3 ارب 60 کروڑ ڈالر کی ترسیلاتِ زر موصول ہوئیں، جو گزشتہ سال اسی مہینے کے مقابلے میں 12.7 فیصد زیادہ ہیں۔خرم شہزاد نے کہا کہ بیرونِ ملک پاکستانیوں کی جانب سے ریکارڈ ترسیلات بھیجنا موجودہ حکومت پر ان کے اعتماد کا اظہار ہے۔انہوں نے بتایا کہ رواں مالی سال کی پہلی سہ ماہی میں ترسیلاتِ زر گزشتہ سال کے مقابلے میں 14 فیصد اضافے کے ساتھ 10 ارب 90 کروڑ ڈالر تک پہنچ گئیں۔ اس عرصے میں سعودی عرب سے 89 کروڑ 90 لاکھ ڈالر، متحدہ عرب امارات سے 74 کروڑ 90 لاکھ ڈالر جبکہ برطانیہ سے 51 کروڑ 50 لاکھ ڈالر پاکستان بھیجے گئے۔اقتصادی ماہرین کا کہنا ہے کہ مؤثر سفارت کاری اور مسلسل معاشی اصلاحات کے نتیجے میں پاکستان کی اقتصادی ساکھ اور عالمی اعتماد میں بہتری آئی ہے۔ ان کے مطابق ترسیلاتِ زر میں اضافہ ملکی معیشت کے لیے حوصلہ افزا اشارہ ہے اور اس سے طویل المدتی معاشی استحکام کی راہ ہموار ہونے میں مدد مل سکتی ہے۔ماہرین کے مطابق یہ اعداد و شمار پاکستان کی معیشت میں بہتری کے رجحان کی عکاسی کرتے ہیں۔