کیلیفورنیا( ویب ڈیسک) محققین اور حکام نے امریکا کے نوجوانوں کو خبردار کیا ہے کہ ٹک ٹاک، انسٹاگرام، ٹوئچ اور آن لائن کھیلوں کے پلیٹ فارمز پر کرپٹو کرنسی سے متعلق فراڈ کے نت نئے اور پیچیدہ طریقے تیزی سے پھیل رہے ہیں۔ دھوکا باز مصنوعی ذہانت اور ڈیپ فیک ٹیکنالوجی کا استعمال کرکے چند منٹوں میں لوگوں کی رقم ہتھیانے کی کوشش کررہے ہیں۔کیلیفورنیا کے اٹارنی جنرل روب بونٹا نے پیر کے روز جاری کردہ انتباہ میں کہا کہ جرائم پیشہ افراد سماجی رابطوں کی ویب سائٹس، براہِ راست نشریات اور ڈیجیٹل سرمایہ کاری کی مختلف اسکیموں کے ذریعے جنریشن زی کو نشانہ بنا رہے ہیں۔ جنریشن زی سے مراد وہ نسل ہے جس میں 1997 سے 2012 کے درمیان پیدا ہونے والے افراد شامل ہیں۔روب بونٹا کی جانب سے پیش کردہ اعداد و شمار کے مطابق، امریکی شہریوں کو 2025 کے دوران انٹرنیٹ فراڈ کے نتیجے میں مجموعی طور پر 20 ارب 90 کروڑ ڈالر کا نقصان ہوا، جس میں سے 11 ارب 40 کروڑ ڈالر کرپٹو کرنسی سے متعلق دھوکا دہی کی نذر ہوئے۔انہوں نے کہا کہ یہ بنیادی طور پر فراڈ کے وہی پرانے طریقے ہیں جن کے خلاف حکام طویل عرصے سے کارروائیاں کررہے ہیں، تاہم کرپٹو کرنسی تک وسیع پیمانے پر رسائی نے دھوکا بازوں کو لوگوں کی رقم ہتھیانے کا ایک نیا اور خطرناک ذریعہ فراہم کردیا ہے۔حکام نے نوجوانوں کو نشانہ بنانے والے آن لائن فراڈ کے کئی عام طریقوں کی نشاندہی بھی کی ہے، جن میں جنسی بلیک میلنگ، مصنوعی ذہانت سے تیار کردہ آوازوں اور ڈیپ فیک ویڈیوز کے ذریعے دھوکا دہی شامل ہیں۔جنسی بلیک میلنگ کے طریقے میں جرائم پیشہ افراد متاثرہ شخص کو دھمکی دیتے ہیں کہ اگر اس نے رقم یا کرپٹو کرنسی ادا نہ کی تو اس کی نجی تصاویر یا ذاتی معلومات عام کردی جائیں گی۔ اس طرح متاثرین کو خوف زدہ کرکے ان سے رقم وصول کرنے کی کوشش کی جاتی ہے۔فراڈ کی ایک اور صورت میں مصنوعی ذہانت سے تیار کردہ آوازوں اور ڈیپ فیک ویڈیوز کا استعمال کیا جاتا ہے۔ ان کے ذریعے دھوکا باز رشتہ داروں، معروف شخصیات یا قابلِ اعتماد افراد کی نقالی کرکے لوگوں کو رقم منتقل کرنے یا حساس معلومات فراہم کرنے پر آمادہ کرتے ہیں۔حکام نے نوجوانوں کو خبردار کیا ہے کہ انٹرنیٹ پر ملنے والی سرمایہ کاری کی غیر معمولی پیشکشوں، اچانک موصول ہونے والے مالی مطالبات اور مشکوک پیغامات پر آنکھ بند کرکے بھروسا نہ کریں۔ کسی بھی شخص کی شناخت کی تصدیق کیے بغیر رقم منتقل کرنے سے گریز کرنا آن لائن فراڈ سے بچاؤ کے لیے اہم ہے۔
