لاہور ( پاکستا ن خبر) پنجاب اسمبلی میں ایران اور امریکا کے درمیان جنگ بندی کے خیرمقدم کے لیے قرارداد جمع کرا دی گئی ہے۔یہ قرارداد مسلم لیگ ن کی رکن حنا پرویز بٹ کی جانب سے پیش کی گئی جس میں ایوان نے جنگ بندی کو خوش آئند قرار دیا ہے۔قرارداد کے متن میں وزیراعظم شہباز شریف، وزیر خارجہ اسحاق ڈار اور عسکری قیادت کو خراج تحسین پیش کرتے ہوئے کہا گیا ہے کہ پاکستان نے مشرق وسطیٰ میں امن کے قیام کے لیے مؤثر اور مخلصانہ کردار ادا کیا۔متن کے مطابق پاکستان کی پرامن سفارتی کوششوں کو عالمی سطح پر تسلیم کیا جا رہا ہے اور یہ پیش رفت حکومت کی بڑی کامیابی قرار دی گئی ہے۔قرارداد میں کہا گیا ہے کہ جس پاکستان کو عالمی سطح پر تنہا کرنے کی کوشش کی جا رہی تھی، وہ آج اہم عالمی فیصلوں میں مؤثر کردار ادا کر رہا ہے۔ایوان نے امن کے قیام کے لیے وفاقی حکومت کے تمام اقدامات کی حمایت کرتے ہوئے ان کی توثیق بھی کی ہے۔
