اسلام آباد(پاکستان خبر)حج کی سعادت حاصل کرنے والے پاکستانی حاجیوں کی وطن واپسی کے لیے پروازوں کا آغاز کل سے کیا جا رہا ہے۔تفصیلات کے مطابق حج آپریشن کے پہلے روز 22 پروازوں کے ذریعے 5237 حاجی اپنے وطن واپس پہنچیں گے۔ پہلی پرواز جدہ سے 391 حاجیوں کو لے کر یکم جون کی صبح سیالکوٹ پہنچے گی۔شیڈول کے مطابق یکم جون کو مختلف شہروں میں مجموعی طور پر متعدد پروازیں پہنچیں گی، جن میں اسلام آباد، کراچی، لاہور، ملتان، فیصل آباد اور کوئٹہ شامل ہیں۔حج بعد از آپریشن کے دوران سرکاری اسکیم کے تحت فریضہ حج ادا کرنے والے تقریباً ایک لاکھ 19 ہزار پاکستانی حجاج کرام کو مجموعی طور پر 471 پروازوں کے ذریعے وطن واپس لایا جائے گا۔اس آپریشن میں پاکستان کی سرکاری، نجی اور سعودی فضائی کمپنیوں کی پروازیں حصہ لے رہی ہیں، جبکہ واپسی کا مرحلہ 30 جون تک جاری رہے گا۔حکام کے مطابق تمام حاجیوں کی محفوظ اور منظم واپسی کے لیے خصوصی انتظامات کیے گئے ہیں تاکہ انہیں کسی قسم کی دشواری کا سامنا نہ کرنا پڑے۔
