وفاقی اداروں کے ملازمین کو بنیادی تنخواہ سے زائد مراعات ملنے کا انکشاف

اسلام آباد(پاکستان خبر) سرکاری ذرائع کے مطابق وفاق کے 50 سے زائد اداروں میں ملازمین کو بنیادی تنخواہ کے 100 فیصد سے بھی زیادہ اضافی مراعات دیے جانے کا انکشاف ہوا ہے۔تنخواہوں کے ڈھانچے سے آگاہ حکام کے مطابق بعض وفاقی اداروں میں مجموعی تنخواہیں عام سرکاری محکموں کے اسی گریڈ کے ملازمین کے مقابلے میں دو سے تین گنا زیادہ ہیں۔ذرائع کا کہنا ہے کہ ان اداروں میں صدر سیکرٹریٹ، وزیراعظم آفس، قومی اسمبلی اور سینیٹ سیکرٹریٹ، اعلیٰ عدالتیں، قومی احتساب بیورو، انٹیلی جنس ادارے، ٹیکس حکام اور مختلف خصوصی ٹربیونلز شامل ہیں۔رپورٹ کے مطابق ان اداروں کے ملازمین کو بنیادی تنخواہ کے ساتھ مختلف اضافی الاؤنسز اور مراعات بھی دی جاتی ہیں، جس کے باعث مجموعی آمدن میں نمایاں اضافہ ہو جاتا ہے۔