لاہور( پاکستان خبر) گورنر خیبر پختونخوا فیصل کریم کنڈی نے حکومت پر زور دیا ہے کہ عوام کو ریلیف دینے کیلئے پیٹرولیم لیوی پر نظرثانی اور غیرضروری حکومتی اخراجات میں کمی کی جائے۔میڈیا سے گفتگو کرتے ہوئے انہوں نے کہا کہ وفاقی حکومت ترقیاتی بجٹ میں کٹوتی کرکے عوام کو سہولت فراہم کرنے کے اقدامات کرے۔ وفاق کے ساتھ مختلف معاملات پر بات چیت جاری ہے اور صوبے کو اپنے مسائل دلیل اور مؤثر انداز میں وفاق کے سامنے رکھنے چاہئیں۔پمز حادثے کے حوالے سے فیصل کریم کنڈی کا کہنا تھا کہ صرف ایک سیکریٹری کو معطل کرنے سے مسئلہ حل نہیں ہوگا۔ ان کے مطابق واقعات کے بعد کمیٹیاں بنائی جاتی ہیں لیکن محض کمیٹیوں کے قیام سے مسائل ختم نہیں ہوتے۔گورنر خیبر پختونخوا نے کہا کہ ملک میں جب تک جزا اور سزا کا مؤثر نظام قائم نہیں ہوگا، ایسے مسائل کا سلسلہ جاری رہے گا۔
