کراچی( کامرس ڈیسک)پاکستان کی ہوزری اور نٹ ویئر برآمدی صنعت کو پیداواری لاگت، ریفنڈز میں تاخیر اور ضابطوں سے متعلق اخراجات میں اضافے کے باعث عالمی منڈی میں مسابقت برقرار رکھنے میں مشکلات کا سامنا ہے۔پاکستان ہوزری مینوفیکچررز اینڈ ایکسپورٹرز ایسوسی ایشن نے صنعت کو درپیش مسائل کے حل اور برآمدی آرڈرز کے تحفظ کیلئے فوری اقدامات کا مطالبہ کردیا ہے۔ پی ایچ ایم اے کے مرکزی چیئرمین ضیا علمدار حسین نے وفاقی سیکریٹری تجارت کو خط لکھ کر مشاورتی اجلاس بلانے کی درخواست کی ہے۔خط میں وزارت تجارت، وزارت خزانہ، اسٹیٹ بینک، ایف بی آر اور متعلقہ اداروں کے نمائندوں کو اجلاس میں شریک کرنے کی تجویز دی گئی ہے تاکہ برآمدی شعبے کے مسائل کا جائزہ لے کر عملی اقدامات طے کیے جاسکیں۔پی ایچ ایم اے کے مطابق صنعت کو بلند پیداواری لاگت، مہنگی بجلی، لوڈشیڈنگ، بھاری ٹیکسوں، بلند فریٹ چارجز، مالی مشکلات، علاقائی مسابقت اور عالمی طلب میں کمی جیسے چیلنجز درپیش ہیں۔ ان حالات میں پاکستانی برآمد کنندگان کیلئے نئے آرڈرز حاصل کرنا اور موجودہ بین الاقوامی خریداروں کو برقرار رکھنا مشکل ہوتا جارہا ہے۔خط کے مطابق اہم عالمی منڈیوں کیلئے سمندری مال برداری کے اخراجات میں ڈیڑھ سے ڈھائی گنا تک اضافہ ہوا ہے، جس سے پاکستانی مصنوعات کی مجموعی لاگت بڑھ گئی ہے اور برآمد کنندگان پر اضافی مالی بوجھ پڑ رہا ہے۔
