تیانجن( ویب ڈیسک) چین کے شہر تیانجن کے ریلوے اسٹیشن پر مصنوعی ذہانت سے لیس روبوٹس کو مسافروں کی رہنمائی اور مختلف خدمات کی فراہمی کے لیے آزمائشی طور پر تعینات کر دیا گیا۔حکام کے مطابق 10 سے زائد روبوٹس کو مسافروں کی حقیقی آمدورفت کے دوران مختلف شعبوں میں آزمایا جا رہا ہے تاکہ ان کی کارکردگی کو مزید بہتر بنایا جا سکے۔ان روبوٹس کو صفائی، معلومات کی فراہمی، معائنہ و سکیورٹی گشت، سکیورٹی جانچ میں معاونت اور خریداری کے دوران رہنمائی سمیت پانچ شعبوں میں استعمال کیا جا رہا ہے۔ریلوے اسٹیشن آنے والے مسافروں نے روبوٹس سے گفتگو بھی کی اور ان کی مختلف صلاحیتوں کا مشاہدہ کیا۔ حکام کا مقصد انہیں حقیقی ماحول سے ہم آہنگ کرنا اور شہری ریل نظام میں مسافروں کو زیادہ مؤثر اور جدید سہولیات فراہم کرنا ہے۔یہ تجربہ شہری ٹرانسپورٹ میں مصنوعی ذہانت اور روبوٹکس کے بڑھتے ہوئے استعمال کی جانب اہم پیش رفت قرار دیا جا رہا ہے۔
