اسلام آباد (کامرس ڈیسک) وزیراعظم شہباز شریف نے عالمی منڈی میں تیل کی قیمتوں میں اضافے کے باعث عوام پر اضافی مالی بوجھ کم کرنے کیلئے خصوصی پٹرول ریلیف سکیم شروع کردی۔اپنے بیان میں وزیراعظم نے کہا کہ پٹرول مہنگا ہونے سے عوام کو درپیش مشکلات کا حکومت کو مکمل احساس ہے، مشکل وقت میں انہیں تنہا نہیں چھوڑیں گے۔شہباز شریف کے مطابق موٹرسائیکل، رکشہ، چنگچی اور چھوٹی گاڑی استعمال کرنے والوں کو ریلیف دینے کیلئے خصوصی سکیم متعارف کرائی گئی ہے۔سکیم کے تحت موٹرسائیکل، رکشہ، چنگچی اور 800 سی سی تک گاڑی رکھنے والوں کو پٹرول پر 100 روپے فی لٹر ریلیف دیا جائے گا۔ دو اور تین پہیوں والی سواریوں کیلئے ماہانہ 20 لٹر، جبکہ 800 سی سی تک گاڑیوں کیلئے ماہانہ 30 لٹر پٹرول پر یہ رعایت دستیاب ہوگی۔وزیراعظم نے بتایا کہ اسلام آباد میں سکیم کا نفاذ آئندہ پیر اور منگل کی درمیانی شب سے، جبکہ ملک بھر، آزاد کشمیر اور گلگت بلتستان میں بدھ اور جمعرات کی درمیانی شب سے ہوگا۔انہوں نے کہا کہ سکیم کیلئے رجسٹریشن آج سے شروع کردی گئی ہے اور طریقہ کار سے متعلق عوام کو آگاہی مہم کے ذریعے معلومات فراہم کی جائیں گی۔شہباز شریف نے موٹرسائیکل، رکشہ اور چھوٹی گاڑیوں سے متعلق معلومات فراہم کرنے اور رجسٹریشن میں تعاون پر صوبائی حکومتوں کا شکریہ بھی ادا کیا۔
