اسلام آباد ( کامرس ڈیسک)کراچی سمیت ملک بھر کے بجلی صارفین کو ملنے والا ایک روپے 99 پیسے فی یونٹ سہ ماہی ایڈجسٹمنٹ ریلیف رواں ماہ ختم ہونے جارہا ہے، جس کے بعد اگلے ماہ بجلی مہنگی ہونے کا خدشہ ہے۔ذرائع کے مطابق بجلی صارفین کو جنوری تا مارچ 2026 کی سہ ماہی ایڈجسٹمنٹ کے تحت 67 ارب 17 کروڑ روپے سے زائد کا ریلیف حاصل ہے، تاہم جون 2026 سے نافذ اس ریلیف کی تین ماہ کی مدت اگست میں مکمل ہوجائے گی۔ذرائع کا کہنا ہے کہ اس کے بعد اپریل تا جون 2026 کی سہ ماہی ایڈجسٹمنٹ اگلے ماہ سے نافذ کیے جانے کا امکان ہے۔بجلی کی تقسیم کار کمپنیوں نے نئی سہ ماہی ایڈجسٹمنٹ کے لیے نیپرا میں درخواست دائر کردی ہے، جس میں صارفین پر 23 ارب روپے سے زائد کا اضافی بوجھ منتقل کرنے کی استدعا کی گئی ہے۔ یہ اضافہ تقریباً ایک روپے فی یونٹ بنتا ہے، تاہم حتمی اضافے کا فیصلہ نیپرا کرے گا۔
