ممبئی( سپورٹس ڈیسک)بھارت میں ایک مقامی کرکٹ میچ کے دوران معمولی تنازع نے خوفناک رخ اختیار کر لیا جہاں رن آؤٹ کے فیصلے پر امپائر کو قتل کر دیا گیا۔میڈیا رپورٹس کے مطابق یہ افسوسناک واقعہ ریاست آندھرا پردیش کے شہر وشاکھاپٹنم میں پیش آیا جہاں امپائر ڈولا اجیت بابو میچ کے دوران پیش آنے والے تنازع کا شکار بنے۔پولیس کے مطابق اتوار کی شام تین ٹیموں کے درمیان جاری میچ میں رن آؤٹ کے فیصلے پر جھگڑا ہوا جسے امپائر اور ان کے ساتھی نے وقتی طور پر ختم کرا دیا تھا۔بعد ازاں ایک تماشائی اس معاملے پر مشتعل ہوگیا اور امپائروں کو بات چیت کے بہانے بلایا، جہاں دوبارہ تلخ کلامی کے دوران اس نے اچانک چاقو سے حملہ کر دیا۔حملے کے نتیجے میں امپائر شدید زخمی ہو گئے اور زخموں کی تاب نہ لاتے ہوئے دم توڑ گئے جبکہ دیگر افراد بھی زخمی ہوئے۔اہل خانہ کے مطابق ملزم نشے کی حالت میں تھا اور اس نے پہلے سے حملے کی منصوبہ بندی کر رکھی تھی، واقعے کے بعد ملزم فرار ہوگیا جبکہ پولیس نے اس کی تلاش شروع کر دی ہے۔
