کیف( مانیٹرنگ ڈیسک) روس کی جانب سے یوکرین کے دارالحکومت کیف پر میزائل اور ڈرون حملوں کے نتیجے میں مزید 24 افراد ہلاک جبکہ 100 سے زائد زخمی ہو گئے۔یوکرینی حکام کے مطابق روس نے پیر کے روز مسلسل دوسرے ہفتے کیف میں رہائشی علاقوں کو نشانہ بنایا، یہ حملہ اہم نیٹو اجلاس سے ایک روز قبل کیا گیا۔صبح کے وقت ہونے والے حملے میں کیف کے پوڈلسکی ضلع میں ایک کثیر المنزلہ رہائشی عمارت کو شدید نقصان پہنچا، جہاں عمارت کی کئی منزلیں تباہ ہو کر دو حصوں میں تقسیم ہو گئیں۔خبر رساں ادارے کے مطابق بیلسٹک میزائل حملے کے دوران 10 سے زائد دھماکوں کی آوازیں سنی گئیں جبکہ آسمان پر روشنی کی چمک بھی دیکھی گئی۔حکام کے مطابق روسی حملوں میں دارالحکومت کیف میں 16 افراد ہلاک ہوئے جبکہ مضافاتی علاقے وِشنِیوے میں مزید 8 افراد جان سے گئے۔ حملوں کے نتیجے میں 100 سے زائد افراد زخمی ہوئے۔
