سپریم کورٹ کا فیصلہ، نیب مقدمات کی سماعت کا اختیار وفاقی آئینی عدالت کو منتقل

اسلام آباد( پاکستان خبر) سپریم کورٹ نے نیب مقدمات سے متعلق اہم فیصلہ جاری کرتے ہوئے قرار دیا ہے کہ نیب کیسز کی سماعت کا اختیار سپریم کورٹ کے پاس نہیں ہے۔جسٹس محمد علی مظہر نے مختصر فیصلہ سناتے ہوئے کہا کہ نیب مقدمات میں مرکزی اپیلیں اور ضمانت کی درخواستیں اب وفاقی آئینی عدالت سنے گی۔ فیصلے میں کہا گیا کہ نیب قانون کی شق 32 اور 32 اے کے تحت سپریم کورٹ کو اختیار سماعت حاصل نہیں۔عدالتی فیصلے کے مطابق آئین کے آرٹیکل 175 اے اور ایف کے تحت آنے والے نیب سے متعلق تمام مقدمات وفاقی آئینی عدالت کو منتقل تصور کیے جائیں گے۔واضح رہے کہ بانی پی ٹی آئی عمران خان نے بھی ہائیکورٹ کے ضمانت کیس کے خلاف سپریم کورٹ سے رجوع کیا تھا، تاہم رجسٹرار سپریم کورٹ نے درخواست پر اعتراضات عائد کرتے ہوئے اسے واپس کر دیا تھا۔سپریم کورٹ کے حالیہ فیصلے کے بعد عمران خان کی ضمانت سے متعلق کیس کی سماعت بھی وفاقی آئینی عدالت میں ہوگی۔