کراچی( کامرس ڈیسک)سیکیورٹیز اینڈ ایکس چینج کمیشن آف پاکستان نے پاکستان کی بزنس ریڈی رینکنگ میں مزید بہتری لانے کے لیے مختلف اہم اقدامات کی منظوری دے دی۔ایس ای سی پی کے مطابق پاکستان بزنس انٹری کیٹیگری میں 101 معیشتوں میں 17ویں نمبر پر ہے، جبکہ اس کیٹیگری میں ملک کا اسکور 86.64 ہے۔ کمپنیوں کی رجسٹریشن اور بعد ازاں ہونے والی تبدیلیوں سے متعلق معلومات خودکار نظام کے ذریعے ایف بی آر کو فراہم کی جارہی ہیں۔ایس ای سی پی، ایف بی آر اور بورڈ آف انویسٹمنٹ اضافی معلومات کے تبادلے کے لیے باہمی تعاون کریں گے، جبکہ ماحولیاتی تقاضوں اور مختلف اجازت ناموں سے متعلق معلومات کا لنک بھی ایس ای سی پی کی ویب سائٹ پر مہیا کیا جائے گا۔ایس ای سی پی کا کہنا ہے کہ چھوٹے اور درمیانے درجے کے کاروباروں اور خواتین کاروباری افراد کے لیے سرکاری معاونتی پروگراموں کی تفصیلات بھی ویب سائٹ پر فراہم کردی گئی ہیں۔ اس کے علاوہ نئی رجسٹر ہونے والی کمپنیوں کے حوالے سے صنفی بنیادوں پر اعدادوشمار بھی جاری کیے گئے ہیں۔جاری کردہ اعدادوشمار میں مرد و خواتین شیئر ہولڈرز، ڈائریکٹرز، چیف ایگزیکٹوز اور حقیقی مالکان کی تفصیلات شامل ہیں۔ ایس ای سی پی کمپنی ڈائریکٹرز اور حقیقی مالکان سے متعلق صنفی بنیادوں پر مزید ڈیٹا سیٹ بھی تیار کرکے شائع کرے گی۔
