اسلام آباد( کامرس ڈیسک) سیکیورٹی خدشات کے پیشِ نظر آئی ایم ایف نے پاکستان کا دورہ قبل از وقت ختم کر دیا ہے۔ اب 1.2 ارب ڈالرز کی اگلی قرض قسط کے لیے مذاکرات ترکیہ سے آن لائن جاری رکھے جائیں گے۔آئی ایم ایف مشن نے کل وزیر خزانہ محمد اورنگزیب سے ملاقات کی، جس کے فوراً بعد مشن پاکستان چھوڑ گیا۔ امریکا نے پاکستان کے لیے لیول تھری سیکیورٹی الرٹ جاری کرتے ہوئے شہریوں کو سفر پر نظرثانی اور بڑے اجتماعات سے گریز کی ہدایت کی تھی، جبکہ بعض علاقوں کو لیول فور قرار دے کر ممنوع قرار دیا گیا۔آئی ایم ایف کے پاکستان نمائندے کے مطابق توسیعی فنڈ سہولت کے تیسرے جائزے اور ریزیلینس اینڈ سسٹین ایبلٹی فیسلٹی کے دوسرے جائزے کے مذاکرات اب ورچوئل طور پر جاری رہیں گے۔ خطے میں کشیدگی اور امریکی سفارتی تنصیبات کے باہر مظاہروں کی وجہ سے سیکیورٹی صورتحال پیچیدہ ہو گئی ہے۔افتتاحی اجلاس میں آئیوا پیٹرووا نے معاشی استحکام کے لیے پائیدار اصلاحات اور محصولات میں اضافے کی ضرورت پر زور دیا، جبکہ صحت اور تعلیم میں سماجی اخراجات بڑھانے کی اہمیت بھی اجاگر کی۔ مشن کی اچانک روانگی کے باعث متعدد اجلاس منسوخ ہو گئے، جن میں خودمختار ویلتھ فنڈ، ای پروکیورمنٹ نظام، احتسابی اداروں کے ساتھ معلومات کے تبادلے، اور سرکاری و عسکری ملکیتی کمپنیوں کی مراعات کے خاتمے کے معاملات شامل تھے۔ فیڈرل بورڈ آف ریونیو کی کارکردگی پر بھی اجلاس ملتوی کر دیا گیا۔
