پشاور( پاکستان خبر) خیبر پختونخوا میں حالیہ دہشت گرد حملوں کے تناظر میں سکیورٹی فورسز نے کوہاٹ، ہنگو اور تھل کے علاقوں میں انٹیلی جنس بنیادوں پر کارروائیاں کرتے ہوئے دہشت گردوں کے ٹھکانوں اور محفوظ پناہ گاہوں کو نشانہ بنایا، جن میں مجموعی طور پر 37 دہشت گرد مارے گئے۔سکیورٹی ذرائع کے مطابق ایک کارروائی میں 9 خوارج ہلاک ہوئے، جبکہ افغانستان سے متصل سرحدی علاقے میں فتنۃ الخوارج اور اس سے منسلک دہشت گرد گروہوں کے 3 کیمپ اور ٹھکانے تباہ کیے گئے۔20 ستمبر کو کوہاٹ اور ہنگو اضلاع میں دہشت گردوں کے ایک گروہ کے خلاف انٹیلی جنس بنیادوں پر زمینی کارروائی کی گئی، جس میں مؤثر کارروائی کے نتیجے میں بھارتی پراکسی فتنۃ الخوارج سے تعلق رکھنے والے 9 خوارج ہلاک ہوئے۔ذرائع کے مطابق قابل اعتماد انٹیلی جنس اطلاعات کی بنیاد پر افغانستان سے متصل سرحدی علاقے میں فتنۃ الخوارج اور اس سے وابستہ دہشت گرد گروہوں کے کیمپوں اور ٹھکانوں کو بھی نشانہ بنایا گیا۔
