کوئٹہ( پاکستان خبر) سکیورٹی فورسز نے بلوچستان میں آپریشن ردالفتنہ 3 کے تحت فتنہ الہندوستان کے خلاف کارروائی کرتے ہوئے 5 دہشتگردوں کو ہلاک جبکہ متعدد کو زخمی کردیا۔سکیورٹی ذرائع کے مطابق پنجگور کے علاقے کلی سوران میں انٹیلی جنس اطلاعات کی بنیاد پر آپریشن کیا گیا۔ دہشتگرد موٹر سائیکلوں پر سوار ہوکر ایک بڑی دہشتگرد کارروائی کی منصوبہ بندی کر رہے تھے۔فورسز نے جدید ٹیکنالوجی اور ہتھیاروں کی مدد سے دہشتگردوں کو نشانہ بنایا۔ کارروائی کے دوران بھاری مقدار میں جدید اسلحہ و گولہ بارود برآمد کیا گیا، جبکہ 3 گاڑیاں، 2 موٹر سائیکلیں، آئی ای ڈی ڈیوائس اور کالعدم تنظیم کا جھنڈا بھی قبضے میں لے لیا گیا۔ذرائع کے مطابق ہلاک دہشتگرد مقامی افراد سے لوٹ مار، بھتہ خوری، اغوا برائے تاوان، ٹارگٹ کلنگ اور خودکش حملوں کی منصوبہ بندی میں ملوث تھے۔سکیورٹی فورسز نے بلوچستان سے دہشتگردی کے خاتمے کے عزم کا اظہار کرتے ہوئے کہا ہے کہ آخری دہشتگرد کے خاتمے تک کارروائیاں جاری رکھی جائیں گی۔
