راولپنڈی( پاکستان خبر) میڈیا انفلوئنسرز کے ساتھ ایک اعلیٰ سکیورٹی عہدیدار کی نشست میں بھارت کے کردار اور خطے کی صورتحال پر تفصیلی گفتگو کی گئی۔سکیورٹی ذرائع کے مطابق بھارت اپنے داخلی مسائل سے توجہ ہٹانے کے لیے خطے بالخصوص پاکستان میں عدم استحکام پیدا کرنے کی کوشش کر رہا ہے، جبکہ بھارتی قیادت زمینی حقائق تسلیم کرنے سے گریزاں ہے۔بیان میں کہا گیا کہ بعض شدت پسند نظریات نے بھارت کے سیکولر تشخص کو متاثر کیا ہے اور اندرونی سیاسی و سماجی تقسیم بڑھ رہی ہے۔ سکیورٹی ذرائع کے مطابق مقبوضہ کشمیر میں صورتحال انتہائی حساس ہے اور وہاں بھاری فوجی موجودگی برقرار ہے۔مزید کہا گیا کہ بھارت کی جانب سے پاکستان کے خلاف مختلف بیانیے اور الزامات کا مقصد عالمی توجہ ہٹانا ہے، جبکہ پاکستان کے استحکام اور ترقی کو بعض عناصر اپنے لیے چیلنج سمجھتے ہیں۔سکیورٹی ذرائع نے یہ بھی کہا کہ پاکستان اپنی خودمختاری اور قومی سلامتی کے تحفظ کے لیے پرعزم ہے اور کسی بھی بیرونی دباؤ کو قبول نہیں کرے گا۔
