راولپنڈی( پاکستان خبر) ستمبر 1965 کی جنگ کے 14ویں روز لاہور کے محاذ سے حاصل ہونے والی بھارتی میجر جنرل کی ڈائری نے جنگ سے متعلق حیران کن حقائق آشکار کردیئے۔جنگ کے دوران پاک فوج اور پاک فضائیہ نے مختلف محاذوں پر دشمن کے خلاف بھرپور کارروائیاں جاری رکھیں اور بھارتی افواج کو شدید نقصان پہنچایا۔ڈائری میں بھارتی فوج کو جنگ کے حوالے سے دیے گئے احکامات کا ذکر ہے، جبکہ اقتدار کی کشمکش میں بھارتی افواج کو بطور مہرہ استعمال کیے جانے کا بھی انکشاف کیا گیا۔نئی دہلی کے سفارتی ذرائع کے مطابق پاکستان کے خلاف بھارتی فوج کی ناقص کارکردگی حکومت کیلئے بڑا بحران بن چکی تھی۔ لاہور کے مقبول پور محاذ پر پاک فوج نے بھارتی حملہ ناکام بناتے ہوئے 150 بھارتی فوجیوں کو ہلاک کیا، جبکہ دشمن اس سے دگنی تعداد میں زخمی فوجی چھوڑ کر فرار ہوگیا۔گدرو محاذ پر پاکستانی فوج نے بھارتی چوکی پر قبضہ کرکے ایک بھارتی افسر سمیت 35 اہلکاروں کو جنگی قیدی بنا لیا۔14 ستمبر کو بھارتی فضائیہ کے مزید 11 جنگی طیارے تباہ ہوئے، جس کے بعد تباہ ہونے والے بھارتی طیاروں کی تعداد 80 ہوگئی، جبکہ 5 بھارتی ٹینک بھی تباہ کیے گئے۔ تعداد میں کم ہونے کے باوجود پاک فضائیہ کے پائلٹس نے پیشہ ورانہ مہارت کے ذریعے دشمن پر برتری ثابت کی۔
