راولپنڈی ( پاکستان خبر) ڈی جی آئی ایس پی آرسیکیورٹی ذرائع کے مطابق بلوچستان اور خیبرپختونخوا میں سیکیورٹی فورسز کی کارروائیوں کے دوران 7 دہشت گرد ہلاک ہوگئے۔بلوچستان میں آپریشن ردالفتنہ 3 کے تحت دہشت گردوں کے خلاف کارروائیاں جاری ہیں۔ ضلع چاغی کے علاقے نوکچہ میں فورسز نے کارروائی کرتے ہوئے 2 دہشت گردوں کو ہلاک کردیا۔سیکیورٹی ذرائع کے مطابق فتنہ الہندوستان کے دہشت گردوں نے نوکچہ میں خالی واٹر باؤزر کو آگ لگانے کے بعد فرار ہونے کی کوشش کی، تاہم فورسز نے فوری کارروائی کرتے ہوئے دونوں دہشت گردوں کو ہلاک کردیا۔ذرائع کا کہنا ہے کہ ہلاک دہشت گرد این 40 شاہراہ کے مختلف مقامات پر آتشزدگی کی کارروائیوں میں بھی ملوث تھے۔ اس سے قبل 31 اگست کو بھی ایسی تخریبی کارروائیوں میں ملوث فتنہ الہندوستان کے 11 دہشت گرد ہلاک کیے گئے تھے۔سیکیورٹی ذرائع کے مطابق بلوچستان سے آخری دہشت گرد کے خاتمے تک کارروائیاں جاری رہیں گی۔دوسری جانب خیبرپختونخوا کے علاقے باڑہ میں عزم استحکام وژن کے تحت سیکیورٹی فورسز نے انٹیلی جنس بنیادوں پر آپریشن کیا، جس کے دوران فتنہ الخوارج کے 5 دہشت گرد ہلاک ہوگئے۔سیکیورٹی ذرائع کے مطابق ہلاک دہشت گردوں سے بڑی مقدار میں اسلحہ اور گولہ بارود برآمد کیا گیا، جبکہ کارروائی کے دوران دہشت گردوں کے ٹھکانوں کو بھی مکمل طور پر تباہ کردیا گیا۔سیکیورٹی فورسز نے ملک سے دہشت گردی کے خاتمے اور پائیدار امن کے قیام کے عزم کا اظہار کیا ہے۔
