کوئٹہ ( پاکستان خبر) بلوچستان میں آپریشن ردالفتنہ 3 کے تحت سیکیورٹی فورسز کا دہشت گردوں کے خلاف کارروائیوں کا سلسلہ جاری ہے، مختلف علاقوں میں دو کارروائیوں کے دوران فتنۃ الہندوستان کے 7 دہشت گرد مارے گئے۔سیکیورٹی ذرائع کے مطابق پنجگور کے علاقے فتح علی میں فورسز نے خفیہ اطلاع پر کارروائی کی، جس کے نتیجے میں 5 دہشت گرد ہلاک ہوئے۔ کارروائی کے بعد دہشت گردوں کے قبضے سے بڑی مقدار میں اسلحہ اور گولہ بارود بھی برآمد کیا گیا۔ذرائع کے مطابق ضلع کچھی کے علاقے دھاڈر میں بھی سیکیورٹی فورسز نے انٹیلی جنس اطلاعات کی بنیاد پر کارروائی کی، جس میں فتنۃ الہندوستان کے 2 دہشت گرد مارے گئے، جبکہ متعدد دہشت گردوں کے زخمی ہونے کی بھی اطلاعات ہیں۔سیکیورٹی فورسز کی جانب سے بلوچستان میں دہشت گردی کے مکمل خاتمے اور امن و امان کے قیام کے لیے کارروائیاں جاری رکھنے کا سلسلہ برقرار ہے۔
