واشنگٹن( مانیٹرنگ ڈیسک) کیلیفورنیا سمیت 7 امریکی ریاستوں نے ٹرمپ انتظامیہ کے خلاف وفاقی عدالت سے رجوع کرلیا ہے، مقدمے میں کانگریس سے منظور شدہ تقریباً 810 ملین ڈالر کے فنڈز روکنے کے اقدام کو چیلنج کیا گیا ہے۔ریاستوں کا مؤقف ہے کہ انتظامیہ نے کانگریس کی منظوری سے مختص رقم جاری کرنے سے گریز کیا اور اسے مالی سال ختم ہونے سے قبل منسوخ کرنے کی کوشش کی۔ اس مقصد کیلئے ’’پاکٹ ریسشن‘‘ نامی طریقہ اختیار کیا گیا، جس کے ذریعے کانگریس کے فیصلہ کرنے سے پہلے ہی فنڈز کی مدت ختم ہونے کا امکان پیدا ہوجاتا ہے۔کیلیفورنیا کے اٹارنی جنرل روب بونٹا کی سربراہی میں دائر درخواست میں مؤقف اختیار کیا گیا ہے کہ وفاقی حکومت کا اقدام اختیارات کی تقسیم اور کانگریس کے مالیاتی اختیار سے متعلق آئینی شقوں سے متصادم ہے۔وائٹ ہاؤس کا کہنا ہے کہ جن پروگراموں کیلئے یہ رقوم مختص تھیں، ان میں غیر قانونی امیگریشن، نسلی کشیدگی اور ماحول سے متعلق ایسی پالیسیوں کی حمایت کی جا رہی تھی جنہیں انتظامیہ مناسب نہیں سمجھتی۔مقدمہ شمالی ضلع کیلیفورنیا کی وفاقی عدالت میں دائر کیا گیا ہے، جہاں وفاقی اخراجات پر صدر کے اختیار اور کانگریس کے مالیاتی اختیارات کی حدود سے متعلق قانونی تنازع زیرِ سماعت ہوگا۔
