اسلام آباد( پاکستان خبر)ملک بھر کی بجلی تقسیم کار کمپنیوں میں صورتحال سنگین ہو گئی ہے اور بجلی کا بحران شدت اختیار کر گیا ہے، جس کے باعث شہریوں کو شدید مشکلات کا سامنا ہے۔ذرائع کے مطابق بجلی کا اوسط شارٹ فال ساڑھے 3 ہزار میگاواٹ سے تجاوز کر گیا ہے، جس کے نتیجے میں لاہور سمیت پنجاب کے مختلف علاقوں میں غیر اعلانیہ لوڈشیڈنگ میں نمایاں اضافہ ہو گیا ہے۔لاہور الیکٹرک سپلائی کمپنی میں شارٹ فال ایک ہزار میگاواٹ سے بھی بڑھ چکا ہے، جس سے بجلی کی فراہمی مزید متاثر ہو رہی ہے۔نیشنل ٹرانسمیشن اینڈ ڈسپیچ کمپنی کے ذرائع کا کہنا ہے کہ آر ایل این جی، ہائیڈرو اور تیل کی قلت کے باعث پیداوار کم ہو رہی ہے، جبکہ لوڈشیڈنگ کا باقاعدہ شیڈول جاری نہ کرنے سے غیر اعلانیہ بندش میں اضافہ ہو رہا ہے۔ذرائع کے مطابق جہاں دو گھنٹے کی لوڈشیڈنگ ہونی چاہیے تھی وہاں کئی علاقوں میں چھ، چھ گھنٹے تک بجلی بند کی جا رہی ہے، اور یہ صورتحال آئندہ چند روز تک برقرار رہنے کا خدشہ ظاہر کیا جا رہا ہے۔
