لاہور ( سپورٹس ڈیسک)قومی کرکٹ ٹیم کے سابق کپتان شاہد خان آفریدی نے کہا ہے کہ ملک کے ہر شہری کو صحت اور تعلیم کی یکساں اور معیاری سہولیات ملنی چاہئیں۔ایک بیان میں شاہد آفریدی نے سوال اٹھایا کہ اگر سرکاری اسپتال اور تعلیمی ادارے واقعی بہترین سہولیات فراہم کرتے ہیں تو حکمران طبقے کے لوگ اپنے بچوں کو ان اداروں میں کیوں نہیں بھیجتے؟انہوں نے کہا کہ اسلام آباد کے پمز اسپتال میں 14 بچے زندگی کی بازی ہار گئے، واقعے کی تحقیقات مکمل ہونے کے بعد رپورٹ سامنے آچکی ہے جبکہ ذمہ دار حکام کو معطل بھی کردیا گیا ہے۔سابق کپتان نے بتایا کہ پمز واقعے کے سلسلے میں فوجداری کارروائی کے احکامات بھی جاری کردیئے گئے ہیں، تاہم کوئی بھی کارروائی ان معصوم بچوں کی زندگی واپس نہیں لا سکتی۔شاہد آفریدی نے ایک بار پھر اس بات پر زور دیا کہ پاکستان کے ہر شہری کو صحت اور تعلیم کے یکساں معیار اور سہولیات تک رسائی حاصل ہونی چاہیے۔
