ویسٹ انڈیز اور انگلینڈ سیریز کے لیے شان مسعود کو کپتانی برقرار رکھنے کا امکان

لاہور ( سپورٹس ڈیسک)دورہ ویسٹ انڈیز اور انگلینڈ کے لیے پاکستان ٹیسٹ ٹیم کی قیادت شان مسعود کے پاس برقرار رہنے کا امکان ظاہر کیا جا رہا ہے۔تفصیلات کے مطابق لاہور میں پاکستان کرکٹ بورڈ (پی سی بی) کا ریڈ بال کرکٹرز کا پری سیزن کیمپ مکمل ہو گیا ہے۔ ذرائع کے مطابق دونوں سیریز کے لیے ٹیم کا اعلان 6 یا 7 جولائی کو کیا جائے گا۔ذرائع کا کہنا ہے کہ شان مسعود کو کپتان برقرار رکھنے پر غور کیا جا رہا ہے جبکہ سعود شکیل اور محمد رضوان نے فٹنس مسائل پر قابو پا لیا ہے اور وہ سلیکشن کے لیے دستیاب ہوں گے۔پی سی بی کی جانب سے اس بار ممکنہ اسکواڈ کا اعلان پریس کانفرنس کے ذریعے کیے جانے کا امکان ہے۔ ٹیم میں ایک سے دو تبدیلیاں متوقع ہیں۔ذرائع کے مطابق ویسٹ انڈیز اور انگلینڈ کی کنڈیشنز کو مدنظر رکھتے ہوئے فاسٹ بولرز کی تعداد زیادہ رکھنے پر غور کیا جا رہا ہے، جبکہ اسپن بولنگ میں ساجد خان کو یقینی انتخاب قرار دیا جا رہا ہے۔ علی عثمان کو بھی زیر غور لایا جا سکتا ہے۔نوجوان کھلاڑیوں میں عبداللہ فضل اور اذان اویس کو موقع دینے کا امکان ہے۔اسلام آباد میں قومی ٹیم کا فائنل تربیتی کیمپ 9 جولائی سے 12 اگست تک جاری رہے گا، جبکہ ٹیم 13 جولائی کو ویسٹ انڈیز کے لیے روانہ ہوگی۔