پاکستان اپنی سرزمین پر بیرونی دہشت گردی کے خاتمے کے لیے پرعزم ہے: وزیراعظم شہباز شریف

کراچی( پاکستان خبر) وزیراعظم شہباز شریف نے کہا ہے کہ پاکستان اپنی سرزمین پر بیرونی دہشت گردی کو ہر قیمت پر ختم کرنے کے لیے پُرعزم ہے۔پاک بحریہ کی پاسنگ آؤٹ پریڈ سے خطاب کرتے ہوئے وزیراعظم نے پاس ہونے والے کیڈٹس کو مبارکباد دی اور دوست ممالک کے کیڈٹس کی شرکت کو خوش آئند قرار دیا۔انہوں نے ملکی دفاع میں پاک بحریہ کے کردار کو سراہتے ہوئے کہا کہ پاکستان نیوی نے ہر مشکل وقت میں بہترین کارکردگی کا مظاہرہ کیا ہے۔ ان کے مطابق “معرکہ حق” میں پاک بحریہ کا کردار تاریخ کا حصہ ہے۔وزیراعظم نے کہا کہ حالیہ علاقائی پیش رفت اور ایران و امریکا کے درمیان مفاہمت خطے کے لیے اہم ہے، اور اس میں پاکستان کے سفارتی کردار کو بھی سراہا گیا ہے۔ ان کا کہنا تھا کہ قیامِ امن کے لیے پاکستان کی کوششیں مؤثر اور مخلصانہ رہی ہیں۔انہوں نے کہا کہ خطے میں بڑی تبدیلیاں دور رس اثرات کی حامل ہوں گی، جبکہ بعض عناصر پراکسیز کے ذریعے پاکستان کے خلاف سرگرم ہیں۔وزیراعظم نے واضح کیا کہ پاکستان بیرونی سرپرستی میں ہونے والی دہشت گردی کو جڑ سے ختم کرنے کے لیے اپنی افواج کے ساتھ مکمل طور پر پرعزم ہے۔