ڈھاکا( مانیٹرنگ ڈیسک) بنگلادیش کی سابق وزیراعظم شیخ حسینہ نے دو سالہ جلاوطنی کے بعد وطن واپسی کا اعلان کرتے ہوئے کہا ہے کہ وہ رواں سال دسمبر میں ملک واپس آنے کی خواہش رکھتی ہیں۔غیر ملکی میڈیا کے مطابق 78 سالہ شیخ حسینہ نے جنوبی ایشیا کے غیر ملکی صحافیوں کے کلب کی ایک تقریب سے ویڈیو لنک کے ذریعے خطاب کیا، جس میں ان کے صاحبزادے سجیب واجد جوئے اور عوامی لیگ کے دیگر رہنما بھی شریک تھے۔شیخ حسینہ نے کہا کہ وطن واپسی پر انہیں گرفتاری یا جیل کا سامنا کرنا پڑ سکتا ہے، تاہم یہ خدشات انہیں عوام کے لیے اپنی ذمہ داریاں ادا کرنے سے نہیں روک سکتے۔انہوں نے کہا کہ وہ اپنے ملک کے عوام کو مشکلات میں چھوڑ کر بیرون ملک قیام جاری نہیں رکھ سکتیں۔سابق وزیراعظم نے اپنی جماعت عوامی لیگ پر عائد پابندی ختم کرنے کا مطالبہ بھی کیا، جبکہ ان کے بیٹے سجیب واجد جوئے نے کہا کہ ان کا موجودہ حکومت سے کوئی رابطہ نہیں ہے۔واضح رہے کہ شیخ حسینہ 2024 میں طلبہ کی قیادت میں ہونے والے احتجاجی مظاہروں کے بعد اقتدار سے الگ ہو گئی تھیں اور ہیلی کاپٹر کے ذریعے بھارت منتقل ہو گئی تھیں، جس کے بعد سے وہ بنگلادیش واپس نہیں آئیں۔
