نئی دہلی( مانیٹرنگ ڈیسک) بنگلا دیش کی سابق وزیراعظم شیخ حسینہ نے کہا ہے کہ وہ اپنی جان کو درپیش خطرات کے باوجود رواں سال دسمبر تک وطن واپس جانے کے لیے پُرعزم ہیں۔شیخ حسینہ کا کہنا ہے کہ انہیں گرفتاری، قید حتیٰ کہ جان سے مارے جانے کے خدشات کا بھی علم ہے، تاہم وہ عوام کی آواز پر اپنے ملک واپس جانا چاہتی ہیں۔غیر ملکی خبر رساں ادارے کے مطابق 78 سالہ شیخ حسینہ نے اپنے تحریری بیان میں کہا کہ انہیں معلوم ہے کہ بنگلا دیش واپسی پر کن حالات کا سامنا کرنا پڑ سکتا ہے، لیکن وہ اپنے عوام کی خواہش پر وطن واپسی کا ارادہ رکھتی ہیں۔شیخ حسینہ اگست 2024 میں طلبہ کی قیادت میں ہونے والی حکومت مخالف تحریک کے نتیجے میں اقتدار سے الگ ہوگئی تھیں، جس کے بعد وہ ہیلی کاپٹر کے ذریعے بھارت منتقل ہوگئیں۔ اس دوران مظاہرین ان کی سرکاری رہائش گاہ تک پہنچ گئے تھے۔اقوام متحدہ کے مطابق حکومت مخالف مظاہروں کو روکنے کے لیے کی جانے والی کارروائیوں میں تقریباً 1,400 افراد جان سے گئے تھے۔بعد ازاں نومبر 2025 میں ڈھاکا کی ایک عدالت نے شیخ حسینہ کو انسانیت کے خلاف جرائم کے مقدمے میں مجرم قرار دیتے ہوئے سزائے موت سنائی، تاہم سابق وزیراعظم نے اس فیصلے کو مسترد کرتے ہوئے اسے ’’قانون کے پردے میں سیاسی انتقام‘‘ قرار دیا۔
