ایس آئی ایف سی کے تحت صنعتی ترقی میں تیزی، سیمنٹ سیکٹر میں 700 ملین ڈالر کی سرمایہ کاری منظور

 اسلام آباد( کامرس ڈیسک)پاکستان میں صنعتی ترقی اور اصلاحاتی عمل کے تسلسل کے تحت اسپیشل انویسٹمنٹ فسیلیٹیشن کونسل (SIFC) کا کردار معیشت کے مختلف شعبوں میں نمایاں تبدیلیاں لا رہا ہے۔ایس آئی ایف سی کی فاسٹ ٹریک پالیسی کے تحت ملک میں 7 نئے سیمنٹ پلانٹس کے لیے مجموعی طور پر 700 ملین ڈالر کی سرمایہ کاری کی منظوری دی گئی ہے۔ ریگولیٹری رکاوٹوں کے خاتمے کے بعد فلیئنگ سیمنٹ اور لکی سیمنٹ سمیت متعدد بڑی کمپنیوں کے منصوبوں کو عملی پیش رفت حاصل ہوئی ہے۔اس سہولت کاری کے نتیجے میں لکی سیمنٹ نے کراچی پلانٹ کی اپ گریڈیشن مکمل کرتے ہوئے پیداواری صلاحیت میں اضافہ کر لیا ہے۔ کراچی پلانٹ کی سالانہ پیداواری صلاحیت 3 لاکھ ٹن کے اضافے کے بعد 5.35 ملین ٹن تک پہنچ گئی ہے۔کمپنی کے مطابق اس جدید اپ گریڈیشن سے نہ صرف فیول ایفیشنسی میں بہتری آئے گی بلکہ کوئلے کے استعمال میں بھی کمی متوقع ہے۔ اس توسیع کے بعد لکی سیمنٹ کی مجموعی پیداواری صلاحیت بڑھ کر 15.6 ملین ٹن سالانہ ہو گئی ہے، جس سے کمپنی نے پاکستان کی سب سے بڑی سیمنٹ پروڈیوسر کے طور پر اپنی پوزیشن مزید مستحکم کر لی ہے۔ماہرین کے مطابق ان منصوبوں سے ملک میں طویل المدتی، پائیدار اور جدید صنعتی ترقی کو فروغ ملے گا، جبکہ ویلیو ایڈیشن اور برآمدات میں بھی اضافہ ہوگا۔مجموعی طور پر یہ پیش رفت اس بات کی عکاس ہے کہ ایس آئی ایف سی کے اصلاحاتی اقدامات پاکستان میں صنعتی ترقی اور سرمایہ کاری کے فروغ میں اہم کردار ادا کر رہے ہیں۔