لاہور (پاکستان خبر) وزیراعظم کے مشیر برائے سیاسی امور رانا ثنا اللہ نے کہا ہے کہ سیاسی و عسکری قیادت نے طے کیا ہے کہ دھرنے اور لانگ مارچ وفاقی دارالحکومت اسلام آباد سے دور ہونے چاہئیں۔نجی ٹی وی سے گفتگو کرتے ہوئے رانا ثنا اللہ کا کہنا تھا کہ اگر پاکستان تحریک انصاف اپنے مطالبات کے حق میں احتجاج کرنا چاہتی ہے تو پشاور، مردان، کراچی یا لاہور میں مظاہرہ کرسکتی ہے۔انہوں نے کہا کہ یہ تاثر درست نہیں کہ مقتدرہ حکومت اور اپوزیشن کے درمیان مذاکرات سے ناخوش ہے۔ ان کے مطابق مذاکرات کا فیصلہ صدر اور وزیراعظم نے کیا ہے اور متعلقہ اداروں کو اعتماد میں لیا گیا ہوگا۔رانا ثنا اللہ نے کہا کہ وزیراعلیٰ خیبر پختونخوا اجلاسوں میں شریک نہیں ہوتے، اگر ان کا کوئی مؤقف ہے تو وہ وفاقی حکومت سے براہِ راست بات کریں۔ انہوں نے اپوزیشن کو بھی لانگ مارچ سے گریز کا مشورہ دیا۔ان کا کہنا تھا کہ گورنر راج اور ایمرجنسی جیسے آئینی راستے مخصوص حالات میں موجود ہوتے ہیں۔ اگر کسی صوبے میں سکیورٹی کی صورتحال خراب ہو اور صوبائی حکومت وفاق سے تعاون نہ کرے تو وفاقی حکومت کے پاس اقدامات کرنے کے سوا کیا راستہ رہ جاتا ہے۔تاہم انہوں نے واضح کیا کہ ایمرجنسی یا گورنر راج پسندیدہ اقدامات نہیں اور صرف ناگزیر صورتحال میں ہی ان پر غور کیا جاسکتا ہے۔واضح رہے کہ حکومت اور اپوزیشن کے درمیان سیاسی معاملات پر مذاکرات کا پہلا دور مکمل ہوچکا ہے، جس میں فریقین نے بات چیت جاری رکھنے پر اتفاق کیا ہے۔
