بند کمروں کے فیصلوں سے حالات خراب ہوئے، صوبہ سنبھالوں گا: سہیل آفریدی

پشاور( پاکستان خبر) وزیراعلیٰ خیبرپختونخوا سہیل آفریدی نے کہا ہے کہ بند کمروں میں کیے گئے فیصلوں کے باعث صوبے کے حالات خراب ہوئے، تاہم وہ صورتحال کو بہتر کر کے دکھائیں گے۔سہیل آفریدی نے پشاور میں جلسے کے مقام کا دورہ کیا اور انتظامات کا جائزہ لینے کے بعد کارکنوں سے خطاب کیا۔ انہوں نے کہا کہ 5 اگست ملکی تاریخ کا ایک اہم دن ہے، جب ملک کی مقبول سیاسی جماعت کے چیئرمین کو گرفتار کیا گیا اور اس واقعے کو تین سال مکمل ہو چکے ہیں۔وزیراعلیٰ خیبرپختونخوا نے کہا کہ 9 اپریل 2022 کو جمہوری حکومت ختم کی گئی، جس کے بعد ملک کے حالات میں خرابی آئی۔انہوں نے کہا کہ پارٹی چیئرمین کی گرفتاری کے تین سال مکمل ہونے پر سیاسی جلسہ منعقد کیا جا رہا ہے، جس میں آئندہ کے لائحہ عمل کا اعلان کیا جائے گا۔سہیل آفریدی کا کہنا تھا کہ خیبرپختونخوا کے موجودہ مسائل بند کمروں کے فیصلوں کا نتیجہ ہیں، تاہم وہ صوبے کے حالات بہتر بنانے کے لیے اقدامات کریں گے۔