لاہور ( سپورٹس ڈیسک)جنوبی افریقا نے نمیبیا میں کھیلی جانے والی ٹی ٹوئنٹی سہ ملکی سیریز کے فائنل میں زمبابوے کو 48 رنز سے ہرا کر رواں سیزن کی پہلی ٹرافی حاصل کرلی۔یہ گزشتہ آٹھ روز کے دوران زمبابوے کے خلاف جنوبی افریقا کی مسلسل تیسری فتح تھی۔تجرباتی کھلاڑیوں پر مشتمل اسکواڈ کے باوجود جنوبی افریقی ٹیم نے ایک مرتبہ پھر 200 سے زائد رنز بنائے۔ لوہان ڈرے پریٹوریئس انجری کے باعث میچ میں شامل نہیں تھے، تاہم کونر ایسٹرہیزن اور جارڈن ہرمن نے 84 رنز کی شراکت سے ٹیم کو مضبوط آغاز فراہم کیا۔ بعد ازاں روبن ہرمن اور ڈیوالڈ بریوس نے پانچویں وکٹ پر 47 رنز جوڑے۔ہدف کے تعاقب میں زمبابوے کی بیٹنگ ابتدا ہی میں مشکلات کا شکار ہوگئی اور محض 57 رنز پر اس کے 6 کھلاڑی آؤٹ ہوگئے۔بریڈ ایونز نے 56 رنز کی ناقابلِ شکست اننگز کھیل کر مزاحمت کی، لیکن ان کی کوشش ٹیم کو فتح دلانے کے لیے کافی ثابت نہ ہوسکی۔واضح رہے کہ اس سہ ملکی سیریز میں جنوبی افریقا اور زمبابوے کے علاوہ میزبان نمیبیا کی ٹیم بھی شامل تھی۔
