جنوبی افریقا ویمنز انڈر 19 ٹیم کا پہلی بار پاکستان دورہ، 5 ٹی ٹوئنٹی میچز کی سیریز طے

لاہور ( سپورٹس ڈیسک)پاکستان کرکٹ بورڈ (پی سی بی) کے مطابق جنوبی افریقا کی ویمنز انڈر 19 ٹیم جولائی میں پہلی مرتبہ پاکستان کا دورہ کرے گی۔پی سی بی کے مطابق دونوں ٹیموں کے درمیان پانچ ٹی ٹوئنٹی میچز پر مشتمل سیریز کھیلی جائے گی، جو 14 سے 24 جولائی تک کراچی کے نیشنل بینک اسٹیڈیم میں منعقد ہوگی۔اعلامیے کے مطابق جنوبی افریقا کی انڈر 19 ویمنز ٹیم 10 جولائی کو کراچی پہنچے گی، جبکہ دونوں ٹیمیں 11 سے 13 جولائی تک اسٹیڈیم میں پریکٹس سیشنز میں حصہ لیں گی۔سیریز کے میچز 14، 17، 19، 22 اور 24 جولائی کو کھیلے جائیں گے۔پی سی بی کا کہنا ہے کہ یہ سیریز ایشین کرکٹ کونسل ویمنز ٹی ٹوئنٹی کپ اور آئی سی سی ویمنز انڈر 19 ٹی ٹوئنٹی ورلڈ کپ کی تیاریوں میں اہم کردار ادا کرے گی۔واضح رہے کہ پی سی بی ویمنز کرکٹ ڈیپارٹمنٹ نے حال ہی میں کراچی میں انڈر 19 کھلاڑیوں کے لیے تربیتی کیمپس بھی منعقد کیے تھے۔