کراچی( کامرس ڈیسک) وزیر بحری امور جنید انوار چوہدری نے کراچی کی بندرگاہوں کے لیے خصوصی ٹرانس شپمنٹ مراعاتی پیکیج کا اعلان کر دیا، جس کا مقصد پاکستان کو خطے کا اہم ٹرانس شپمنٹ مرکز بنانا ہے۔اپنے بیان میں وزیر بحری امور نے کہا کہ وزیراعظم کے وژن کے مطابق بحری شعبے میں اصلاحات کا سلسلہ جاری ہے، جبکہ کراچی پورٹ اور پورٹ قاسم کی قیادت میں بندرگاہی تجارت کو فروغ دیا جا رہا ہے۔جنید انوار چوہدری کے مطابق ٹرانس شپمنٹ کارگو کی ہینڈلنگ لاگت کم کرنے کا فیصلہ کیا گیا ہے تاکہ پاکستانی بندرگاہوں کی کارکردگی اور عالمی مسابقت میں اضافہ ہو سکے۔انہوں نے بتایا کہ ٹرانس شپمنٹ جہازوں کو پورٹ ہینڈلنگ چارجز میں 80 فیصد تک رعایت دی جائے گی۔ کراچی پورٹ پر وہارفج چارجز میں 20 سے 80 فیصد تک کمی جبکہ 14 روز تک مفت اسٹوریج کی سہولت فراہم کی جائے گی۔ اس کے علاوہ ٹی پی ایکس ایریا میں 30 روز تک مفت اسٹوریج کی سہولت بھی دستیاب ہوگی۔وزیر بحری امور کے مطابق پورٹ قاسم پر وہارفج چارجز میں مکمل 100 فیصد رعایت دی جائے گی، جبکہ وہاں موجود ٹرمینلز پر 7 روزہ مفت اسٹوریج کی سہولت ہوگی جسے 21 روز تک بڑھایا جا سکے گا۔انہوں نے مزید کہا کہ کنٹینر ٹرمینلز نے بھی ٹرمینل ہینڈلنگ چارجز میں 25 فیصد تک کمی کر دی ہے۔چیئرمین کراچی پورٹ ریئر ایڈمرل (ر) شاہد احمد نے کہا کہ زیادہ ٹرانس شپمنٹ کارگو لانے والے جہازوں کو اضافی مراعات دی جائیں گی، جس سے جہازوں کے بندرگاہ پر قیام کے دورانیے میں نمایاں کمی آئے گی۔وزیر بحری امور نے مزید اعلان کیا کہ تمام سابقہ ٹرانس شپمنٹ ایس آر اوز اور نوٹیفکیشنز ختم کر کے نئی پالیسی نافذ کر دی گئی ہے۔
