کراچی( کامرس ڈیسک)پاکستان اسٹاک ایکسچینج میں کاروباری ہفتے کے تیسرے روز نمایاں تیزی دیکھی جا رہی ہے، جہاں سرمایہ کاروں کا رجحان مثبت رہا۔کاروبار کے دوران 100 انڈیکس میں 4918 پوائنٹس کا نمایاں اضافہ ریکارڈ کیا گیا، جس کے بعد انڈیکس بڑھ کر 1 لاکھ 70 ہزار 553 پوائنٹس کی سطح پر پہنچ گیا۔آج کے کاروبار کے دوران انڈیکس 1 لاکھ 69 ہزار 387 پوائنٹس کی کم ترین سطح تک بھی آیا، جبکہ 1 لاکھ 70 ہزار 640 پوائنٹس کی بلند ترین سطح کو بھی چھوا، جو مارکیٹ میں مضبوط سرگرمی کی عکاسی کرتا ہے۔یاد رہے کہ گزشتہ روز کاروبار کے اختتام پر 100 انڈیکس 1 لاکھ 65 ہزار 634 پوائنٹس پر بند ہوا تھا۔دوسری جانب انٹر بینک میں امریکی ڈالر کی قدر میں معمولی کمی ریکارڈ کی گئی ہے، جہاں ڈالر 3 پیسے سستا ہو کر 278 روپے 94 پیسے کا ہو گیا، جبکہ گزشتہ روز یہ 278 روپے 97 پیسے پر بند ہوا تھا۔
