سٹاک مارکیٹ میں زبردست تیزی، ہنڈرڈ انڈیکس میں دو ہزار سے زائد پوائنٹس کا بڑا اضافہ

کراچی ( کامرس ڈیسک) مشرق وسطیٰ کی بہتر ہوتی صورتحال کے باعث پاکستان سمیت ایشیائی سٹاک مارکیٹوں میں آج مثبت رجحان دیکھنے میں آیا ہے۔ کاروباری ہفتے کے آخری روز آغاز پر سٹاک مارکیٹ میں نمایاں تیزی ریکارڈ کی گئی، جس کے نتیجے میں ہنڈرڈ انڈیکس دو ہزار سے زائد پوائنٹس کے اضافے کے ساتھ ایک لاکھ سڑسٹھ ہزار آٹھ سو چوالیس پوائنٹس کی سطح تک پہنچ گیا۔گزشتہ کاروباری روز کے اختتام پر یہی انڈیکس دو سو ترانوے پوائنٹس کی کمی کے بعد ایک لاکھ پینسٹھ ہزار پانچ سو سترہ پوائنٹس پر بند ہوا تھا۔دوسری جانب مشرق وسطیٰ میں کشیدگی میں کمی کے اثرات ایشیائی منڈیوں پر بھی مثبت انداز میں ظاہر ہوئے ہیں۔ جاپان کے نکی انڈیکس میں دو فیصد اضافہ ریکارڈ کیا گیا، جبکہ تھائی لینڈ کے سیٹ انڈیکس میں ایک فیصد بہتری دیکھی گئی۔ اسی طرح چین اور ہانگ کانگ کی سٹاک مارکیٹوں میں بھی تقریباً ایک فیصد اضافہ سامنے آیا ہے، جس سے خطے کی مجموعی معاشی فضا میں بہتری کا تاثر مضبوط ہوا ہے۔