پنجاب میں گرد آلود ہواؤں اور بارش کا امکان، محکمہ موسمیات نے الرٹ جاری کر دیا

لاہور(پاکستان خبر) لاہور سمیت پنجاب کے مختلف علاقوں میں گرد آلود ہواؤں اور بارش برسانے والا کمزور موسمی سسٹم موجود ہے، جس کے باعث موسم میں جزوی تبدیلی متوقع ہے۔محکمہ موسمیات کے مطابق لاہور میں کم سے کم درجہ حرارت 26 ڈگری سینٹی گریڈ ریکارڈ کیا گیا ہے، جبکہ زیادہ سے زیادہ درجہ حرارت 34 ڈگری تک جانے کا امکان ہے۔ آج بھی لاہور سمیت پنجاب کے مختلف حصوں میں گرد آلود ہواؤں کے ساتھ بارش کی پیشگوئی کی گئی ہے۔پی ڈی ایم اے پنجاب نے صوبے بھر میں آندھی، بارش اور ژالہ باری کے حوالے سے الرٹ جاری کر دیا ہے۔ الرٹ کے مطابق پنجاب کے بیشتر اضلاع میں بارش کا امکان موجود ہے۔متاثرہ علاقوں میں راولپنڈی، مری، گلیات، اٹک، جہلم، چکوال، بھکر، لیہ، فیصل آباد، جھنگ، اوکاڑہ، گوجرانوالہ، حافظ آباد اور وزیر آباد شامل ہیں، جہاں کہیں کہیں تیز ہواؤں کے ساتھ بارش متوقع ہے۔اسی طرح سرگودھا، میانوالی، شیخوپورہ، خوشاب، ڈیرہ غازی خان، بہاولپور، بہاولنگر، ملتان، خانیوال، لودھراں، مظفرگڑھ، راجن پور، رحیم یار خان، کوٹ ادو اور منڈی بہاالدین میں بھی بارش کی پیشگوئی کی گئی ہے۔محکمہ نے لاہور، سیالکوٹ، نارووال، فیصل آباد اور جھنگ سمیت دیگر علاقوں میں بھی بارش کا امکان ظاہر کیا ہے۔ڈی جی پی ڈی ایم اے کے مطابق وزیراعلیٰ پنجاب مریم نواز کی ہدایات پر تمام کمشنرز اور ڈپٹی کمشنرز کو الرٹ جاری کر دیا گیا ہے۔ لاہور میں ممکنہ بارش کے پیش نظر واسا کو فیلڈ میں موجود رہنے کی ہدایت بھی کی گئی ہے۔حکام نے شہریوں کو ہدایت کی ہے کہ آندھی اور گرج چمک کے دوران محفوظ مقامات پر رہیں اور کھلے میدانوں سے گریز کریں۔ کسانوں اور سیاحوں کو بھی موسم کی صورتحال کے مطابق احتیاطی تدابیر اختیار کرنے کی ہدایت دی گئی ہے۔