نیویارک( سپورٹس ڈیسک) یو ایس اوپن میں عالمی نمبر ایک ٹینس کھلاڑی آرینا سبالینکا کو تیسرے راؤنڈ کے میچ کے دوران اس وقت غیر معمولی صورتحال کا سامنا کرنا پڑا جب اسٹیڈیم میں بھنگ کی شدید بو پھیل گئی۔بین الاقوامی خبر رساں ادارے کے مطابق لوئس آرمسٹرانگ اسٹیڈیم میں ازبکستان کی کامیلا راخیمووا کے خلاف میچ کے دوران سبالینکا نے دوسرے سروس گیم میں کچھ دیر کے لیے کھیل روک دیا اور امپائر ایوا اسدراکی مور کی توجہ بو کی جانب دلائی۔سبالینکا نے امپائر سے کہا کہ بو بہت تیز ہے اور اسے دور کرنے کے لیے ضروری کارروائی کی جائے، کیونکہ اس صورتحال میں کھیل پر توجہ مرکوز کرنا مشکل ہورہا ہے۔میچ کے بعد سبالینکا نے وضاحت کی کہ انہیں لوگوں کے تفریح کرنے یا بھنگ استعمال کرنے پر اعتراض نہیں، تاہم ان کی خواہش ہے کہ شائقین ٹینس کورٹ کے قریب ایسا نہ کریں، کیونکہ اس سے کھلاڑیوں کی توجہ متاثر ہوتی ہے۔انہوں نے بتایا کہ تیز ہوا کے باعث باہر سے آنے والی بھنگ کی بو اسٹیڈیم تک پہنچ گئی۔ سبالینکا کے مطابق انہوں نے ٹورنامنٹ کے دوران اس سے پہلے بھی ایسی بو محسوس کی تھی، تاہم اس مرتبہ اس کی شدت غیر معمولی تھی۔واضح رہے کہ نیویارک میں 21 سال سے زائد عمر افراد کے لیے تفریحی طور پر بھنگ کا استعمال قانونی ہے، تاہم یو ایس اوپن کے احاطے میں سگریٹ نوشی کی اجازت نہیں ہے۔
