اسلام آباد( پاکستان خبر) سپریم کورٹ نے توشہ خانہ فوجداری کیس میں بانی پی ٹی آئی عمران خان سے ملاقات کے لیے بیرسٹر سلمان صفدر کو عدالتی نمائندہ مقرر کرتے ہوئے اجازت دے دی ہے۔چیف جسٹس یحییٰ آفریدی کی سربراہی میں 2 رکنی بنچ نے کیس کی سماعت کے دوران حکم دیا کہ سلمان صفدر جیل جا کر عمران خان کی حالت زار اور دستیاب سہولیات کے بارے میں تفصیلی تحریری رپورٹ پیش کریں۔ چیف جسٹس نے اٹارنی جنرل کو ہدایت کی کہ ملاقات میں کسی قسم کی رکاوٹ نہ ڈالی جائے اور سلمان صفدر براہِ راست عدالت سے رابطہ کر سکتے ہیں۔عدالت نے سپرنٹنڈنٹ جیل سے بھی رپورٹ طلب کی اور سماعت 12 فروری تک ملتوی کر دی۔ اٹارنی جنرل نے عدالت میں 5 اگست سے 18 اگست 2023 تک کی رپورٹ پیش کی جو اٹک جیل میں قید کے دوران مرتب کی گئی تھی۔اس موقع پر وکیل لطیف کھوسہ نے کہا کہ انہیں بھی عمران خان سے ملاقات کی رسائی نہیں دی جا رہی، جس پر چیف جسٹس نے کہا کہ سلمان صفدر آج ہی ملاقات کے لیے جائیں گے۔بیرسٹر سلمان صفدر آج دوپہر 2 بجے اڈیالہ جیل میں عمران خان سے ملاقات کریں گے اور ملاقات کے بعد رپورٹ سپریم کورٹ میں جمع کروائی جائے گی۔
