کراچی( پاکستا ن خبر) وفاقی اور سندھ حکومت کے ساتھ مذاکرات میں مطالبات کا حل نہ نکلنے پر گڈز ٹرانسپورٹرز نے آج، 8 اگست سے ملک گیر غیر معینہ مدت کی ہڑتال شروع کرنے کا اعلان کردیا۔صدر آل پاکستان گڈز ٹرانسپورٹ اتحاد ملک شہزاد اعوان نے کہا کہ جمعے کو وفاقی اور سندھ حکومت کے ساتھ ہونے والے مذاکرات بے نتیجہ رہے۔ ان کے مطابق دونوں حکومتیں مطالبات کے حل کے لیے سنجیدہ نظر نہیں آئیں، اس لیے ٹرانسپورٹرز ہڑتال کے فیصلے پر قائم ہیں۔مذاکرات میں وفاقی حکومت کی جانب سے وزیر مواصلات، سیکریٹری مواصلات، چیئرمین این ایچ اے اور آئی جی موٹروے شریک ہوئے، جبکہ سندھ حکومت کی نمائندگی کمشنر کراچی، سیکریٹری ٹرانسپورٹ، سیکریٹری ایکسائز، ڈی آئی ٹریفک، ڈی آئی ڈرائیونگ لائسنس، پی ٹی اے اور آر ٹی اے کے حکام نے کی۔ملک شہزاد اعوان کے مطابق مذاکرات کے باوجود گڈز ٹرانسپورٹرز کے دیرینہ مطالبات کا کوئی حل نہیں نکالا جاسکا، جس کے باعث آج سے غیر معینہ مدت تک ملک گیر ہڑتال کی جارہی ہے۔
