اسلام آباد(کامرس ڈیسک) وفاقی وزیر خزانہ محمد اورنگزیب نے چھوٹے دکانداروں کے لیے خصوصی ٹیکس اسکیم متعارف کراتے ہوئے یقین دہانی کرائی ہے کہ تاجروں کو ہراساں نہیں کیا جائے گا۔وزیر مملکت خزانہ بلال اظہر کیانی کے ہمراہ پریس کانفرنس میں محمد اورنگزیب نے کہا کہ حکومت تاجروں کی مشاورت سے ٹیکس نظام کو آگے بڑھا رہی ہے۔ انہوں نے کہا کہ ٹیکس نظام کو آسان اور سادہ بنانا تاجروں کی دیرینہ خواہش رہی ہے اور انہیں اس نئی اسکیم سے امیدیں وابستہ ہیں۔وزیر خزانہ کے مطابق ایف بی آر اور پرال نے چھوٹے دکانداروں کے لیے ٹیکس معاملات آسان بنانے کی کوشش کی ہے۔ انہوں نے کہا کہ تاجروں کو یقین دلانا ضروری ہے کہ انہیں ہراساں نہیں کیا جائے گا، تاہم ہر طبقے کو ٹیکس نظام میں شامل کیے بغیر یہ نظام مؤثر نہیں ہوسکتا۔بلال اظہر کیانی نے بتایا کہ چھوٹے دکاندار موبائل فون کی ایپلی کیشن کے ذریعے ٹیکس گوشوارے جمع اور ٹیکس ادا کرسکیں گے۔ نئی اسکیم کے تحت انہیں فروخت کے مقام پر ٹیکس وصولی کے نظام سے استثنیٰ دیا جائے گا اور ’’گرین پلیٹ‘‘ جاری کی جائے گی۔انہوں نے کہا کہ جس دکان پر گرین پلیٹ آویزاں ہوگی، وہاں ایف بی آر کا افسر داخل نہیں ہوگا۔ اسکیم سے فائدہ اٹھانے والے چھوٹے دکانداروں کو کم از کم 25 ہزار روپے ٹیکس ادا کرنا ہوگا، جبکہ شرط یہ ہے کہ گزشتہ تین برس میں کسی ایک سال کی فروخت 20 کروڑ روپے سے زیادہ نہ ہوئی ہو۔
