جنگ بندی کے باوجود مشرقِ وسطیٰ میں کشیدگی برقرار، لبنان میں اسرائیلی حملوں سے صورتحال مزید سنگین

جنیوا( مانیٹرنگ ڈیسک)ایک امریکی عہدیدار کے مطابق اسرائیل اور حزب اللہ کے درمیان جنگ بندی پر اتفاق کے باوجود خطے میں کشیدگی برقرار ہے، جبکہ جنگ بندی کے بعد بھی اسرائیلی حملوں کی اطلاعات سامنے آئی ہیں۔لبنانی میڈیا کے مطابق جنوبی لبنان کے علاقے نبطیہ میں اسرائیل نے فضائی اور ڈرون حملے کیے، جو جنگ بندی نافذ ہونے کے چند گھنٹے بعد ہی کیے گئے۔ ان حملوں کے نتیجے میں مزید 5 افراد کے جاں بحق ہونے کی اطلاعات ہیں، جبکہ رہائشی عمارتوں اور گھروں کو بھی شدید نقصان پہنچا ہے۔یہ جنگ بندی امریکا کی ثالثی میں جمعہ کے روز طے پائی تھی، تاہم اس کے باوجود صورتحال مکمل طور پر معمول پر نہیں آ سکی۔رپورٹس کے مطابق جنگ کے باعث خطے میں جاری کشیدگی نے سوئٹزرلینڈ میں امریکہ اور ایران کے درمیان ہونے والے مذاکرات کو بھی متاثر کیا، جو مستقل امن معاہدے کی جانب پیش رفت کے لیے کیے جا رہے تھے۔ایرانی اعلیٰ مذاکرات کار نے واضح کیا ہے کہ تہران اپنی “سرخ لکیروں” پر کوئی سمجھوتہ نہیں کرے گا، تاہم اسی دوران آبنائے ہرمز میں بحری آمدورفت جزوی طور پر بحال ہوتی دکھائی دی ہے، جو پہلے تقریباً بند ہو چکی تھی۔مزید رپورٹس کے مطابق اسرائیلی فوج نے لبنان میں حزب اللہ کے متعدد اہداف کو نشانہ بنانے کا دعویٰ کیا ہے، جبکہ دونوں طرف سے جانی نقصان کی اطلاعات بھی سامنے آئی ہیں، جس سے خطے کی مجموعی صورتحال بدستور غیر یقینی بنی ہوئی ہے۔