لاہور( پاکستان خبر)امیر جماعت اسلامی پاکستان حافظ نعیم الرحمان نے کہا ہے کہ دہشت گردی کا خاتمہ صرف طاقت کے استعمال سے ممکن نہیں بلکہ اس کے اسباب کو ختم کرنا ناگزیر ہے۔منصورہ میں جماعت اسلامی کے تربیتی اجتماع سے خطاب کرتے ہوئے انہوں نے کہا کہ حکومت سے ناجائز قبضہ چھڑوانا اب ناگزیر ہو چکا ہے، جبکہ کشمیر اور فلسطین جیسے اہم قومی اور عالمی مسائل پر حکمرانوں کی خاموشی اور کمزوری باعثِ تشویش ہے۔حافظ نعیم الرحمان نے واضح کیا کہ کشمیری عوام کی شمولیت کے بغیر کسی بھی ثالثی کو قبول نہیں کیا جا سکتا، جبکہ غزہ سے متعلق ایسے عالمی فورمز کا حصہ بننا درست نہیں جو فلسطینیوں کے مؤقف کے خلاف ہوں۔انہوں نے کہا کہ پاکستان کا قیام اس لیے عمل میں آیا تھا کہ یہاں اللہ کا نظام، عدل اور انصاف قائم ہو، نہ کہ چند خاندان اقتدار اور وسائل پر قابض رہیں۔ ان کا کہنا تھا کہ اگر عوامی رائے کو دباکر فارم 47 کے ذریعے حکومتیں مسلط کی جائیں گی تو ملکی مسائل میں مزید اضافہ ہوگا۔ جماعت اسلامی افراد نہیں بلکہ پورے نظام کی تبدیلی کی جدوجہد کر رہی ہے۔سندھ حکومت پر تنقید کرتے ہوئے حافظ نعیم نے کہا کہ کراچی پاکستان کی معیشت کا مرکز اور تمام قومیتوں کا شہر ہے، جسے لسانی یا خاندانی سیاست کی نذر نہیں کیا جا سکتا۔ انہوں نے کہا کہ کراچی پر قابض جعلی حکومت سے نجات عوام کا حق ہے اور جماعت اسلامی اس مقصد کے لیے عوامی طاقت سے جدوجہد کرے گی۔ ان کا کہنا تھا کہ اس حوالے سے احتجاجی دھرنے کو روکنا حکومت کے بس میں نہیں ہوگا۔
