اسلام آباد( کامرس ڈیسک)ملک میں ٹیکسٹائل برآمدات میں اضافہ دیکھا گیا ہے جسے معیشت کے استحکام کی جانب ایک اہم پیش رفت قرار دیا جا رہا ہے۔سرکاری اعداد و شمار کے مطابق رواں مالی سال کے 11 ماہ میں ٹیکسٹائل برآمدات 1.83 فیصد اضافے کے ساتھ 16.67 ارب ڈالر تک پہنچ گئی ہیں۔ اس عرصے میں نِٹ ویئر کی برآمدات 4.60 ارب ڈالر جبکہ ریڈی میڈ گارمنٹس کی برآمدات 3.97 ارب ڈالر ریکارڈ کی گئیں۔کاٹن یارن کی برآمدات میں بھی 13.35 فیصد اضافہ ہوا، جس سے اس شعبے کا مجموعی حجم 701.1 ملین ڈالر تک پہنچ گیا۔رپورٹ کے مطابق برآمدات میں یہ بہتری صنعتی سرگرمیوں میں تسلسل، عالمی منڈی میں مسابقت اور پیداواری عمل میں بہتری کی عکاسی کرتی ہے۔ متعلقہ اداروں کے مطابق اس پیش رفت سے زرمبادلہ کے ذخائر، روزگار کے مواقع اور صنعتی ترقی کو تقویت مل رہی ہے۔
