بینکاک( مانیٹرنگ ڈیسک) تھائی لینڈ نے غیر قانونی کاروبار اور غیر ملکی شہریوں کی جانب سے نامزد افراد کے ذریعے جائیدادیں خریدنے کے خلاف بڑے پیمانے پر کارروائی شروع کردی۔غیر ملکی شہریوں سے متعلق جرائم اور قوانین کی خلاف ورزیوں کے واقعات سامنے آنے کے بعد حکومت نے ویزا فری قیام کی مدت 60 روز سے کم کرکے 30 روز کردی ہے۔چینل نیوز ایشیا اور دیگر ذرائع کے مطابق وزیراعظم انوتین چرنویراکول نے متعلقہ سرکاری اداروں کے اجلاس کی صدارت کرتے ہوئے غیر قانونی سرگرمیوں کے خلاف سخت کارروائی کی ہدایت کی۔ ان کا کہنا تھا کہ غیر ملکیوں کی جانب سے قانون کی خلاف ورزیاں قابل قبول حد سے تجاوز کرچکی ہیں۔انوتین چرنویراکول نے کہا کہ تھائی لینڈ نے غیر ملکیوں کو داخلے کی سہولت فراہم کی ہے، اس لیے انہیں بھی ملکی قوانین کی پابندی کرنا ہوگی، جبکہ ملک کا استحصال کرنے کی کوشش کرنے والوں کو برداشت نہیں کیا جائے گا۔
