امریکا ایران تنازع، ثالث ممالک کی دونوں فریقوں سے الگ بات چیت متوقع

تہران (مانیٹرنگ ڈیسک) امریکا اور ایران کے درمیان ثالثی کے لیے مختلف ممالک کے نمائندوں کی دونوں فریقوں سے الگ الگ ملاقاتیں اور مذاکرات متوقع ہیں۔ایک عالمی خبر رساں ادارے نے مذاکرات سے واقف امریکی اہلکار کے حوالے سے بتایا کہ ثالث ممالک کے نمائندے امریکا اور ایران کے ساتھ علیحدہ طور پر بات چیت کریں گے۔رائٹرز کے مطابق ایرانی وزیر خارجہ عباس عراقچی اور قطر کے ثالث اس وقت امریکا میں موجود ہیں، جہاں ایران کی جانب سے پیش کردہ سات روزہ تجویز کے نظرثانی شدہ مسودے پر گفتگو متوقع ہے۔دوسری جانب ایرانی ذرائع ابلاغ نے ذرائع کے حوالے سے دعویٰ کیا ہے کہ ایرانی وفد کا امریکا کے ساتھ براہِ راست مذاکرات کا کوئی منصوبہ نہیں اور نیویارک میں امریکی حکام سے بھی براہِ راست بات چیت نہیں ہوگی۔ایرانی مؤقف کے مطابق تہران اپنی تجاویز اور شرائط قطر کے ثالث کے ذریعے واشنگٹن تک پہنچا چکا ہے اور اب امریکی جواب کا منتظر ہے۔اس سے قبل امریکی صدر ڈونلڈ ٹرمپ نے ایران کے ساتھ مذاکرات دوبارہ شروع ہونے کا امکان ظاہر کیا تھا، جبکہ قطر سمیت دیگر ثالث ممالک دونوں ملکوں کے درمیان بالواسطہ رابطے بحال رکھنے کے لیے سفارتی کوششیں جاری رکھے ہوئے ہیں۔