برلن (مانیٹرنگ ڈیسک) جرمنی میں ہالینڈ کی سرحد کے قریب ایک چھوٹا طیارہ حادثے کا شکار ہوگیا، جس کے نتیجے میں 3 ڈچ شہری جان سے گئے۔عالمی میڈیا کے مطابق ہالینڈ کی وزارت خارجہ نے حادثے کی تصدیق کرتے ہوئے بتایا کہ جاں بحق افراد میں 57 اور 58 سالہ 2 مرد جبکہ 23 سالہ ایک خاتون شامل ہیں۔وزارت خارجہ کے مطابق طیارے نے مقامی وقت کے مطابق صبح 10 بج کر 25 منٹ پر وسطی مغربی ہالینڈ کے شہر ہلورسوم کے ایک چھوٹے ہوائی اڈے سے اڑان بھری تھی۔تقریباً 11 بج کر 18 منٹ پر جرمن ریاست نارتھ رائن ویسٹ فیلیا کے شہر ایرکلنز کے علاقے گردیراتھ کے قریب طیارے کا ریڈار سے رابطہ منقطع ہوگیا، جس کے کچھ ہی دیر بعد وہ گر کر تباہ ہوگیا۔حکام کا کہنا ہے کہ طیارے میں تینوں ہلاک شدگان ہی سوار تھے، جبکہ یہ طیارہ ہالینڈ کے ہلورسوم فلائٹ اسکول میں رجسٹرڈ تھا۔فلائٹ اسکول انتظامیہ نے حادثے کی وجوہات سامنے آنے تک تمام پروازیں فوری طور پر معطل کردی ہیں۔ ہالینڈ کے سیفٹی بورڈ نے ابتدائی تحقیقات میں معاونت کیلئے 2 فضائی حادثات کے ماہرین بھی جرمنی روانہ کردیئے ہیں۔
