ٹیرف پالیسی کے ذریعے پاک بھارت نیوکلیئر کشیدگی سمیت کئی ممکنہ جنگیں روکی ہیں: ٹر مپ

واشنگٹن( مانیٹرنگ ڈیسک) امریکی صدر ڈونلڈ ٹرمپ نے اپنے دوسرے صدارتی دور کے پہلے اسٹیٹ آف دی یونین خطاب میں کہا ہے کہ انہوں نے ٹیرف پالیسی کے ذریعے پاک بھارت نیوکلیئر کشیدگی سمیت کئی ممکنہ جنگیں روکی ہیں، اور مختلف ممالک اب بھی امریکا کے ساتھ تجارتی تعلقات برقرار رکھنے کے خواہاں ہیں۔صدر ٹرمپ نے ایران کے حوالے سے کہا کہ ملک ایسے میزائل تیار کر رہا ہے جو جلد ہی امریکا تک پہنچ سکتے ہیں، تاہم امریکا ایران سے مسئلہ سفارتکاری کے ذریعے حل کرنا چاہتا ہے۔ انہوں نے دعویٰ کیا کہ ایران میں 32 ہزار مظاہرین کو حکومت نے قتل کیا اور امریکی کارروائیوں نے ایرانی جوہری ہتھیاروں کے مبینہ پروگرام کو تباہ کر دیا۔اس کے علاوہ صدر نے ٹیرف کے خلاف سپریم کورٹ کے فیصلے پر سخت تنقید کی اور دعویٰ کیا کہ امریکی سرحدیں اب سب سے زیادہ محفوظ ہیں، گزشتہ نو ماہ میں کوئی بھی غیر قانونی تارکِ وطن ملک میں داخل نہیں ہو سکا، جبکہ غیر قانونی مہاجرین کو ملک سے نکالا جا رہا ہے۔